ମୁମ୍ବାଇ: ଗୋଟିଏ ପଟେ କରୋନା, ଅନ୍ୟପଟେ ବାତ୍ୟା ନିସର୍ଗ । ନିସର୍ଗ ଆଜି ମୁମ୍ବାଇ ତଟରେ ମାଡ଼ ହୋଇ ଦେଖାଇଛି ତାର ତାଣ୍ଡବ ରୂପ । ମୁମ୍ବାଇର ଅଲ୍ଲୀବାଗରେ ନିସର୍ଗ ବାତ୍ୟା ଲ୍ୟାଣ୍ଡଫଲ କରିଥିଲା । ଲ୍ୟାଣ୍ଡଫଲ ପରେ ସମୁଦ୍ର ଅଶାନ୍ତ ହୋଇ ପଡିଥିଲା । ଏହି ସମୟରେ ପବନର ବେଗ ଘଣ୍ଟା ପ୍ରତି ୧୦୦ରୁ ୧୨୦ ଥିଲା । ଫଳରେ ଗଛ ଉପୁଡି ପଡିବା ସହ କଚ୍ଚା ଘର ମଧ୍ୟ ଭାଙ୍ଗି ଯାଇଛି ।
ବାତ୍ୟା ରାଜଧାନୀ ମୁମ୍ବାଇରେ ପହଂଚିବା ସହ ଆରମ୍ଭ ହୋଇଯାଇଥିଲା ତାଣ୍ଡବ । ସତର୍କତା ସ୍ୱରୁପ ବାନ୍ଦ୍ରା ୱର୍ଲି ସି-ଲିଙ୍କକୁ ବନ୍ଦ କରିଦିଆଯାଇଥିଲା । ବ୍ରିଜ୍ ଉପରେ ଗାଡି ଚଳାଚଳ ବନ୍ଦ ରହିଥିଲା ।
ଲୋକଙ୍କୁ ଏହି ପ୍ରାକୃତିକ ଆପଦରୁ ରକ୍ଷା କରିବା ପାଇଁ ସମୁଦ୍ର ତଟରେ ମୁମ୍ବାଇ ପୋଲିସ ଓ ଏନଡିଆରଏଫ ଯବାନ ମୂତୟନ ଥିଲେ ।
ବାତ୍ୟା କାରଣରୁ ପାଣିପାଗ ବିଭାଗ ସମୁଦ୍ରରେ ହାଇ ଟାଇଡ୍ ଆସିବା ଆଶଙ୍କା କରିଛି । ସମୁଦ୍ରରେ ୬ ଫୁଟ ଉଚ୍ଚତାର ଲହଡି ଆସିବାର ଆଶଙ୍କା କରାଯାଉଛି । ହାଇଟାଇଡ୍ କାରଣରୁ ମୁମ୍ବାଇ ଜଳମଗ୍ନ ହେବା ଆଶଙ୍କା ରହିଛି ।
ନିସର୍ଗ କାରଣରୁ କେବଳ ମହାରାଷ୍ଟ୍ର ନୁହେଁ ଗୁଜରାଟ ଓ ଅନ୍ୟକିଛି ରାଜ୍ୟରେ ପ୍ରବଳ ବର୍ଷା ହେଉଛି । ଏନଡିଆରଏଫର ଯବାନ ମଙ୍ଗଳବାର ଦିନ କିଛି ଗାଁକୁ ଯାଇ ଲୋକଙ୍କୁ ବାତ୍ୟା ବେଳେ କଣ କରିବା ଉଚିତ୍ କଣ କରିବା ଅନୁଚିତ ସେ ବାବଦରେ ବୁଝାଇଥିଲେ ।
ପାଲଘର ଓ ପଡୋଶୀ ଜିଲ୍ଲା ଠାଣେର ଆଗରୁ କର୍ଫ୍ୟୁ ଲାଗୁ କରାଯାଇଛି । କର୍ଫ୍ୟୁ ଗୁରୁବାର ପର୍ଯ୍ୟନ୍ତ ଲାଗୁ ରହିବ । ମତ୍ସ୍ୟଜୀବୀଙ୍କ ସମେତ କାହାରିକୁ ମଧ୍ୟ ସମୁଦ୍ରକୁ ଯିବା ପାଇଁ ଅନୁମତି ନାହିଁ ।
ବାତ୍ୟା କାରଣରୁ ରାସ୍ତାକଡର ଉଠାଦୋକାନ ଗୁଡିକ ଅଧିକ କ୍ଷତିଗ୍ରସ୍ତ ହୋଇଛନ୍ତି । ପାଲଘର, ବସାଇ ଓ ତଲାସରୀ ତହସିଲରେ ଅନେକ କଚ୍ଚା ଘର ଭାଙ୍ଗି ଯାଇଛି । କଚ୍ଚା ଘରେ ରହୁଥିବା ୧୫ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନଙ୍କୁ ସ୍ଥାନାନ୍ତରିତ କରାଯାଇଛି । ପବନ ମାଡରେ ସଡକ କଡରେ ଥିବା ଅନେକ ଗଛ ଉପୁଡି ପଡିଛି । ଗଛ ମାଡି ବସି ଅନେକ ଗାଡି ମଧ୍ୟ କ୍ଷତିଗ୍ରସ୍ତ ହୋଇଛି ।
ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ଅନୁସାରେ ବାତ୍ୟା ମୁକାବିଲା ପାଇଁ ତାଙ୍କ ସରକାର ବିଭିନ୍ନ ତଟବର୍ତ୍ତୀ ଅଂଚଳରେ ଏନଡିଆରଏଫର ୧୫ ଓ ରାଜ୍ୟ ବିପର୍ଯ୍ୟୟ ପ୍ରତିକ୍ରିୟା ବଳର ୪ଟି ଟିମକୁ ମୂତୟନ କରାଯାଇଛି ।
ସୂଚନାଯୋଗ୍ୟ ଯେ, ନିସର୍ଗ ମୁମ୍ବାଇ ନିକଟରେ ଥିବା ଅଲିବାଗ ତଟରେ ଗୁରୁବାର ଦିପହରରେ ଲ୍ୟାଣ୍ଡଫଲ କରିଥିଲା । ପାଣିପାଗ ବିଭାଗ ଅନୁସାରେ ସେ ସମୟରେ ବାତ୍ୟାର ବେଗ ଘଣ୍ଟା ପ୍ରତି ୧୨୦କିମି ଥିଲା । ପାଣିପାଗ ବିଭାଗ ଅନୁସାରେ ଲ୍ୟାଣ୍ଡଫାଲ ପ୍ରକ୍ରିୟା ପ୍ରାୟ ୩ ଘଣ୍ଟା ପର୍ଯ୍ୟନ୍ତ ଚାଲିଥିଲା ।
