ଭୁବନେଶ୍ୱର : ରାଜଧାନୀ ଭୁବନେଶ୍ୱରରୁ ଆଜି ୫ଜଣ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଏମାନଙ୍କୁ ମିଶାଇ ଭୁବନେଶ୍ୱରରେ ଆକ୍ରାନ୍ତଙ୍କ ସଂଖ୍ୟା ୧୨୭ରେ ପହଞ୍ଚିଛି। ନୂଆ ଆକ୍ରାନ୍ତଙ୍କ ମଧ୍ୟରେ ରହିଛନ୍ତି ଚିନ୍ତାମଣିଶ୍ୱର ଅଞ୍ଚଳର ବୁଧେଶ୍ୱର ମନ୍ଦିର ନିକଟରୁ ୩୧ବର୍ଷୀୟ ବ୍ୟକ୍ତି, ପଟିଆ ଅଞ୍ଚଳର ୪୧ ବର୍ଷୀୟ ବ୍ୟକ୍ତି, ଖଣ୍ଡଗିରିସ୍ଥିତ କୋଳଥିଆର ୨୬ବର୍ଷିୟ ମହିଳା ଓ ନୟାପଲ୍ଲୀ ବେହେରା ସାହିର ୩୭ବର୍ଷିୟ ମହିଳା। ପଞ୍ଚମ ଆକ୍ରାନ୍ତ ଜଣକ ଏକ ଘରୋଇ ଡାକ୍ତରଖାନାର ୨୮ବର୍ଷିୟ ମହିଳା କର୍ମଚାରୀ ବୋଲି ଭୁବନେଶ୍ୱର ମହାନଗର ନିଗମ ସୂଚନା ଦେଇଛି। କରୋନା ଆକ୍ରାନ୍ତ ଚିହ୍ନଟ ହୋଇଥିବା ଅଞ୍ଚଳକୁ ସାନିଟାଇଜ କରାଯାଉଥିବା ବେଳେ ସେମାନେ କାହା ସଂସ୍ପର୍ଶରେ ଆସିଛନ୍ତି ତାହାର ଅନୁସନ୍ଧାନ ଜାରି ରହିଛି। ଚିନ୍ତାମଣିଶ୍ୱରରୁ ଚିହ୍ନଟ ହୋଇଥିବା କରୋନା ଆକ୍ରାନ୍ତ ଦିଲ୍ଲୀରୁ ଫେରିଥିବା ବେଳେ ପଟିଆରୁ ଚିହ୍ନଟ ଆକ୍ରାନ୍ତ ସାଉଦି ଆରବ, ଖଣ୍ଡଗିରିରୁ ଚିହ୍ନଟ ଆକ୍ରାନ୍ତ ପଶ୍ଚିମବଙ୍ଗର ମେଦିନିପୁର ଓ ନୟାପଲ୍ଲୀରୁ ଚିହ୍ନଟ ହୋଇଥିବା ଆକ୍ରାନ୍ତ ଅନ୍ୟ ଜିଲ୍ଲାରୁ ଗତ ଜୁନ ୮ତାରିଖରେ ଭୁବନେଶ୍ୱରକୁ ଆସିଥିଲେ। ଘରୋଇ ଡାକ୍ତରଖାନାର କର୍ମଚାରୀ ଜୁନ ୧୧ରେ ଅନ୍ୟ ରାଜ୍ୟରୁ ଭୁବନେଶ୍ୱରକୁ ଆସିଥିଲେ ବୋଲି କୁହାଯାଇଛି।
