ଭୁବନେଶ୍ୱର,୩ା୮: ରାଜଧାନୀ ଭୁବନେଶ୍ୱରରେ ୧.୪ ପ୍ରତିଶତ ଲୋକଙ୍କ ଦେହରେ ଆଣ୍ଟିବଡ଼ି ସୃଷ୍ଟି ହୋଇଛି । ଆଣ୍ଟିବଡ଼ି ହେଉଛି ଶରୀରରେ ସୃଷ୍ଟି ହୋଇଥିବା ରୋଗ ପ୍ରତିରୋଧ ଶକ୍ତି । ୧.୪ ପ୍ରତିଶତ ଲୋକ ଅଜାଣତରେ କରୋନାରେ ଆକ୍ରାନ୍ତ ହୋଇ ଭଲ ହୋଇ ଯାଇଛନ୍ତି । ପ୍ରଥମ ପର୍ଯ୍ୟାୟରେ ହୋଇଥିବା କମ୍ୟୁନିଟି ସେରୋ ସର୍ଭେରୁ ଏହା ଜଣାପଡ଼ିଛି । ହାଇ ରିସ୍କ ଗ୍ରୁପରେ ମଧ୍ୟ କରାଯାଇଥିବା ସର୍ଭେରୁ ଏହି ସମାନ ରିପୋର୍ଟ ଆସିଛି ।
ଭୁବନେଶ୍ୱର ଓ ପୁରୀ ପରେ ଆଜିଠାରୁ ବ୍ରହ୍ମପୁରରେ ସିରୋ ସର୍ଭେ ଆରମ୍ଭ ହୋଇଛି । ବ୍ରହ୍ମପୁରର ୨୫ଟି ୱାର୍ଡରେ ନମୁନା ସଂଗ୍ରହ କରାଯିବ । ୨୫୦୦ ନମୁନା ସଂଗ୍ରହ ଟାର୍ଗେଟ ଥିବା ବେଳେ ୧୫ଶହ କମ୍ୟୁନିଟି ଓ ୧୦୦୦ ହାଇରିସ୍କ ଗ୍ରୁପରୁ ନମୁନା ସଂଗ୍ରହ କରାଯିବ । କମ୍ୟୁନିଟି ଅର୍ଥାତ ସାଧାରଣ ଲୋକଙ୍କଠାରୁ ନମୁନା ସଂଗ୍ରହ କରାଯିବ ଏବଂ ହାଇରିସ୍କ ଗ୍ରୁପ୍ ଅର୍ଥାତ ଡାକ୍ତର, ନର୍ସ, ପୁଲିସ କର୍ମଚାରୀ ଏବଂ ଯେଉଁମାନେ କରୋନା ରୋଗୀଙ୍କ ସଂସ୍ପର୍ଶରେ ଆସିବାର ଅଧିକ ସମ୍ଭାବନା ରହିଛି ସେମାନଙ୍କଠାରୁ ନମୁନା ସଂଗ୍ରହ କରାଯିବ ।
ଏହାପରେ ଅଗଷ୍ଟ ୧୬ରେ ଦ୍ୱିତୀୟ ପର୍ଯ୍ୟାୟ ସେରୋ ସର୍ଭେ ହେବ । ଦ୍ୱିତୀୟ ପର୍ଯ୍ୟାୟ ସେରୋ ସର୍ଭେରେ ଜୁଲାଇର ସ୍ଥିତି ବିଷୟରେ ଜଣାପଡ଼ିବ । ପ୍ରଥମ ପର୍ଯ୍ୟାୟ ସର୍ଭେରେ ଜୁନ ମାସର ସ୍ଥିତି ଜଣାପଡ଼ିଥିଲା । ସେହିପରି ଆଜି ବ୍ରହ୍ମପୁରରେ ସେରୋ ସର୍ଭେ ଆରମ୍ଭ ହୋଇଛି । ଆସନ୍ତା ୬ରୁ କଟକ, ବଡ଼ମ୍ବା ଓ ନରସିଂହପୁରରୁ ସେରୋ ସର୍ଭେ କରାଯିବ ବୋଲି ସୂଚନା ମିଳିଛି ।
