ଭୁବନେଶ୍ବର : ରାଜ୍ୟରେ ଉଦବେଗଜନକ ସ୍ଥିତିରେ କୋରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଆଜି ସକାଳୁ ପୁଣି 73 ନୂଆ କୋରୋନା ପଜେଟିଭ୍ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରୁ 3 ଜଣ ଖୋର୍ଦ୍ଧା ଜିଲ୍ଲାରୁ। ସମସ୍ତେ ସୁରତରୁ ଫେରି କ୍ଵାରେଣ୍ଟାଇନ ସେଣ୍ଟରରେ ଥିଲେ। ସେହିପରି ଗଞ୍ଜାମରୁ 43 ଜଣ ସୁରତ ଫେରନ୍ତା କ୍ଵାରେଣ୍ଟାଇନ ସେଣ୍ଟରରେ ଥିଲେ। ଭଦ୍ରକରୁ ଚିହ୍ନଟ ହୋଇଥିବା 9 ଜଣଙ୍କ ମଧ୍ୟରୁ 5 ଜଣ ସୁରତ ଫେରନ୍ତା, 3 ଜଣ ପଶ୍ଚିମବଙ୍ଗ ଫେରନ୍ତା, ଓ ଜଣେ କର୍ଣ୍ଣାଟକ ଫେରନ୍ତା, ଯାଜପୁରରୁ 17 ଜଣ ପଶ୍ଚିମବଙ୍ଗ ଫେରନ୍ତା ଓ ସୁନ୍ଦରଗଡ଼ରୁ 2 ଜଣ କଣ୍ଟେନମେଣ୍ଟ ଜୋନରୁ ଚିହ୍ନଟ ହୋଇଛନ୍ତି।
ଏହି କ୍ରମରେ ରାଜ୍ୟରେ କୋରୋନା ଆକ୍ରାନ୍ତଙ୍କ ସଂଖ୍ୟା 611କୁ ବୃଦ୍ଧି ହୋଇଥିବା ବେଳେ 465ଟି ଆକ୍ଟିଭ୍ କେସ୍ ରହିଛି, 143 ଜଣ ସୁସ୍ଥ ହୋଇ ଘରକୁ ଫେରିଥିବା ବେଳେ 3 ଜଣ ମୃତ୍ୟୁବରଣ କରିଛନ୍ତି। ଏନେଇ ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ଟ୍ଵିଟ୍ କରି ସୂଚନା ଦିଆଯାଇଛି।
