ପଶ୍ଚିମବଙ୍ଗ, ୧୫/୪ : ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଭିତରେ ଏକ ନିରାଶଜନକ ଖବର ଆସିଛି । ନିର୍ବାଚନ ଲଢ଼ୁଥିବା ଜଣେ ପ୍ରାର୍ଥୀଙ୍କର ଆଜି କରୋନାରେ ମୃତ୍ୟୁ ହୋଇଛି । ପଶ୍ଚିମବଙ୍ଗ ମୁର୍ସିଦାବାଦ୍ ସମସେରଗଞ୍ଜ ଆସନରୁ ନିର୍ବାଚନ ଲଢ଼ୁଥିବା କଂଗ୍ରେସ ପ୍ରାର୍ଥୀ ରିଜାଉଲ ହକଙ୍କ ଗୁରୁବାର ଏକ ଘରୋଇ ହସ୍ପିଟାଲରେ ମୃତ୍ୟୁ ଘଟିଛି । କରୋନା ସଂକ୍ରମିତ ହେବା ପରେ କଂଗ୍ରେସ ନେତା ରିଜାଉଲ୍ ହକ୍ କୋଲକାତାର ଏକ ଘରୋଇ ହସ୍ପିଟାଲ୍ ରେ ଚିକିତ୍ସିତ ହେଉଥିଲେ । ତାଙ୍କ ଅବସ୍ଥା ସଙ୍କଟାପର୍ଣ୍ଣ ହେବାରୁ ଗତକାଲି ବିଳମ୍ବିତ ରାତିରେ ଦେହାନ୍ତ ହୋଇଛି ।
ରିଜାଉଲଙ୍କ ମୃତ୍ୟୁ ସମ୍ପର୍କରେ ସୁଚନା ଦେଇଛନ୍ତି ବଙ୍ଗଳା କଂଗ୍ରେସ ସଚିବ ରୋହନ୍ ମିତ୍ର । ସେ ଟୁଇଟ୍ କରି ଲେଖିଛନ୍ତି ଯେ ମୁର୍ସିଦାବାଦ୍ ଜିଲ୍ଲାର ସମସେରଗଞ୍ଜ ବିଧାନସଭା ଆସନ ପାଇଁ କଂଗ୍ରେସ ପାଇଁ ଲଢ଼ୁଥିବା ପ୍ରାର୍ଥୀ ରିଜାଉଲ୍ ହକ୍ ଙ୍କ ଗତକାଲି ରାତିରେ କରୋନା ମହାମାରୀ କାରଣରୁ ମୃତ୍ୟୁ ହୋଇଯାଇଛି। ପଶ୍ଚିମବଙ୍ଗରେ ଚତୁର୍ଥ ପର୍ଯ୍ୟାୟ ନିର୍ବାଚନ ସମୟରେ ତାଙ୍କର ଏପରି ମୃତ୍ୟୁ ହୋଇଥିବା ଖବର ସମସ୍ତ ଦଳୀୟ କର୍ମୀଙ୍କୁ ମର୍ମାହତ କରିଛି ।
