ଦାରିଙ୍ଗବାଡି, ୧୦/୮ (ତରଣୀ ସାହୁ): ଦାରିଙ୍ଗବାଡି ବ୍ଲକର ବିଭିନ୍ନ ଅଂଚଳରୁ ଗଞ୍ଜେଇ ଜବତ କରାଯିବା ସହ ୨ ଜଣଙ୍କୁ ଗିରଫ କରାଯାଇଛି । ଦାରିଙ୍ଗବାଡି ଥାନା ପୋଲିସ ଏକ ପିକଅପ୍ ଭ୍ୟାନରୁ ୧ କୁଇଣ୍ଟାଲ ୩୦୦ ଗ୍ରାମ ଗଞ୍ଜେଇ ଜବତ କରିଥିବା ବେଳେ ଗାଡ଼ି କୁ ମଧ୍ୟ ଜବତ କରିଛି । ଚୋରା ଚାଲାଣରେ ସଂପୃକ୍ତ ଥିବା ୨ ଜଣ ଯୁବକଙ୍କୁ ମଧ୍ୟ ଗିରଫ କରିଛି ପୋଲିସ । ୨ ଜଣ ଯୁବକ ହେଲେ ବାଲିଗୁଡ଼ା ଥାନା ଜୋଗେରମାହା ଗ୍ରାମର ଏଲିସାୟା ଦିଗାଲ ଓ ସନୋଜ ପ୍ରଧାନ । ଦୁହେଁ ମିଶି ଏକ ପିକଅପ୍ ଭ୍ୟାନରେ ନିଜ ଗାଁ ରୁ ଗଞ୍ଜେଇ ନେଇ ଗଞ୍ଜାମ ଆଡ଼କୁ ଯାଉଥିବା ବେଳେ ଦାରିଙ୍ଗବାଡି ପୋଲିସ ବିଶେଷ ସୂତ୍ର ରୁ ଖବର ପାଇଁ ଥାନା ଅଧିକାରୀ ଆନନ୍ଦ ଚନ୍ଦ୍ର ପାତ୍ର ଙ୍କ ତତ୍ୱାବଧାନ କ୍ରମେ ଏସଆଇ ଜୀତେନ୍ଦ୍ର ବେହେରା ସହ ପୋଲିସ ଫୋର୍ସ ବଇନି ଶଙ୍ଖ ନିକଟରେ ଚଢଉ କରି ଗଞ୍ଜେଇ ସହ ଗାଡ଼ି ଜବତ କରିଥିବା ବେଳେ ୨ ଯୁବକ ଙ୍କୁ ଗିରଫ କରିଥିଲେ । ପୋଲିସ ଏନେଇ ମାମଲା ନମ୍ୱର ୧୨୯/୨୪ ରୁଜୁ କରି ଏସଆଇ ଲକ୍ଷ୍ମୀ ମାଝୀ ଏହାର ଅଧିକ ତଦନ୍ତ କରୁଛନ୍ତି । ସେହିପରି ବ୍ରାହ୍ମଣୀଗାଁ ଥାନା ପୋଲିସ ପକ୍ଷରୁ ମଧ୍ୟ ଗଞ୍ଜେଇ ଜବତ କରାଯାଇଛି । ମାଣ୍ଡିପଙ୍କା ଜଙ୍ଗଲରେ ପାଟ୍ରୋଲିଂ ବେଳେ ୩ ଟି ଗଞ୍ଜେଇ ଭର୍ତ୍ତି ବସ୍ତା ଜବତ ହୋଇଥିଲା । ଉକ୍ତ ବସ୍ତାରେ ୯୫ କେଜି ଗଞ୍ଜେଇ ରହିଥିବା ଥାନା ଅଧିକାରୀ ଚିରଞ୍ଜୀବ ବେହେରା କହିଛନ୍ତି। ଶୁକ୍ରବାର ଦିନ ଏସଆଇ ଅମରେନ୍ଦ୍ର ସୁବୁଦ୍ଧିଙ୍କ ସମେତ ପୋଲିସ ଫୋର୍ସ ପାଟ୍ରୋଲିଂ କରୁଥିବା ବେଳେ ବିଶେଷ ସୂତ୍ର ରୁ ଖବର ପାଇ ପୋଲିସ ଦଳ ଉକ୍ତ ଜଙ୍ଗଲ ଭିତରକୁ ଯାଇଥିଲେ। ସେଠାରେ ୩ଟି ବସ୍ତାରେ ଗଞ୍ଜେଇ ଭର୍ତି ହୋଇଥିଲା। ଗଞ୍ଜେଇ ଜବତ ହୋଇଥିବା ବେଳେ କାହାରିକୁ ଗିରଫ କରାଯାଇନାହିଁ । ଏନେଇ ପୋଲିସ ମାମଲା ନମ୍ୱର ୯୯/୨୪ ରୁଜୁ କରି ଘଟଣାର ତଦନ୍ତ କରୁଛି ।
