ଗୁଣପୁର, ୨୯।୦୬ (ସିଦ୍ଧାର୍ଥ ଦାଶ) ଆଦିବାସୀ ଅଧ୍ୟୁଷିତ ରାୟଗଡ଼ା ଜିଲ୍ଲା ଗୁଣୁପୁର ଉପଖଣ୍ଡ ଚିକିତ୍ସାଳୟର ୭ ଟି ବ୍ଳକ ସହ ପଡୋଶୀ ଗଜପତି ଓ ଆନ୍ଧ୍ର ପ୍ରଦେଶର କିଛି ଲୋକ ମଧ୍ୟ ଗୁଣପୁର ଉପଖଣ୍ଡ ଚିକିତ୍ସାଳୟ ଉପରେ ନିର୍ଭର କରିଥାନ୍ତି । ଭିତ୍ତିଭୂମି ରହିଛି,ହେଲେ ଆବଶ୍ୟକୀୟ ବିଶେଷଜ୍ଞ ଡାକ୍ତର ଅଭାବରୁ ସେମିତ ପଡିରହିଛି । ଆଗକୁ କରୋନାର ତୃତୀୟ ଲହର ଆସିବ ଓ ଶିଶୁମାନଙ୍କୁ ଅଧିକ ପ୍ରଭାବିତ କରିବ ବୋଲି ସ୍ୱାସ୍ଥ୍ୟ ବିଶେଷଜ୍ଞ ମାନେ ଚେତାବନୀ ଦେଇ ସାରିଛନ୍ତି । ରାଜ୍ୟ ସରକାର ମଧ୍ୟ ଏନେଇ ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଥିବା ସୂଚନା ମିଳିଛି । ହେଲେ ଦୁର୍ଭାଗ୍ୟ ର ବିଷୟ ହେଉଛି ଜିଲ୍ଲାର ସବୁଠାରୁ ବଡ଼ ସବ୍ ଡିଭିଜନ ଡାକ୍ତରଖାନାରେ ଦୀର୍ଘ ବର୍ଷ ଧରି ଶିଶୁ ବିଶେଷଜ୍ଞ ନାହାଁନ୍ତି ।
ଫଳରେ ଏଠାକାର ଲୋକେ ବାଧ୍ୟହୋଇ ପାରଳାଖେମୁଣ୍ଡି , ବ୍ରହ୍ମପୁର ଓ ବିଶାଖାପାଟଣା ଉପରେ ନିର୍ଭର କରୁଛନ୍ତି । ସବୁଠାରୁ ବଡ଼ ସମସ୍ୟା ହେଉଛି ଅତି ସାଧାରଣ ଗରୀବ ହେଉ କି ଆଦିବାସୀ ଏମାନଙ୍କ ପକ୍ଷରେ ଅନ୍ୟତ୍ର ଯାଇ ଚିକିତ୍ସା କରେଇବା ସମ୍ଭବ ହେଉନାହିଁ । ଯଦି କରୋନା ର ତୃତୀୟ ଲହର ଶିଶୁଙ୍କୁ କବଳିତ କରେ ତେବେ ଏଠାକାର ବାସିନ୍ଦା କରିବେ କଣ ? ଚିକିତ୍ସା ପାଇଁ ଯିବେ କୁଆଡେ ? ଏଠାରେ ୧୯ ଜଣ ଡାକ୍ତର ରହିବା କଥା। ହେଲେ ଅଛନ୍ତି ମାତ୍ର ୭ ଜଣ ୧୨ ଟି ପଦବୀ ଖାଲି ପଡ଼ିଛି । ଚକ୍ଷୁ, ଅସ୍ଥିଶଲ୍ୟ, ଶିଶୁ, ଭେଷଜ,ନିସ୍ତେଜକ, ଦାନ୍ତ ଭଳି ଗୁରୁତ୍ୱପୂର୍ଣ୍ଣ ବିଭାଗ ରେ ନାହାଁନ୍ତି ଡାକ୍ତର ।
ସେହିଭଳି ନର୍ସିଂ, ଫାର୍ମାସିଷ୍ଟ, ଲେବ ଟେକ୍ନିସିଆନ ବିଭାଗ ରେ ମୋଟ ୩୮ ଜଣ କର୍ମଚାରୀ ରହିବା ବଦଳରେ ଏଠି ଅଛନ୍ତି ମାତ୍ର ୧୮ ଜଣ । ୨୦ଟି ପଦବୀ ଖାଲି ପଡ଼ିଛି । ଏ ସମସ୍ୟା ନେଇ ଗୁଣୁପୁର ବିଧାୟକ ରଘୁନାଥ ଗମାଙ୍ଗ ବିଧାନସଭା ରେ ପ୍ରଶ୍ନ ଉଠେଇଥିଲେ ବି ସରକାର ଗୁରୁତ୍ୱ ନ ଦେବା ଘଟଣା ଲୋକଙ୍କ ସ୍ୱାସ୍ଥ୍ୟ ପ୍ରତି ସରକାର କେତେ ଚିନ୍ତିତ ସ୍ପଷ୍ଟ ଅନୁମାନ କରାଯାଉଛି । ଅନ୍ୟ ପକ୍ଷ ରେ ଓଡିଶାର ସବୁ ଠାରୁ ବଡ଼ ସ୍ଵାସ୍ଥ୍ଯ ସଂସ୍ଥା ବିଜୁ ସ୍ଵାସ୍ଥ୍ଯ କଲ୍ଯାଣ ବୋର୍ଡ ର ଉପଦେଷ୍ଟା ଭାବେ ଉପଖଣ୍ଡର ଜିଲ୍ଲା ର ତୁଙ୍ଗ ବିଜେଡି ନେତା ଶ୍ରୀ ସୁଧୀର ଦାଶ ଙ୍କୁ ନିଯୁକ୍ତି ଦେବା ପରେ ଗୁଣପୁର ଉପଖଣ୍ଡ ସ୍ୱାସ୍ଥ୍ୟ ସେବା ରେ ସୁଧାର ଆସିବ ବୋଲି ଲୋକଙ୍କ ବହୁ ଆଶା ଓ ଭରସା ଥିଲା ତଥାପି ଏଠାର ଜନତା ଏହାର୍ ସୁଫଳ ପାଇ ପାରୁନାହାନ୍ତି।
ରାଜ୍ଯରେ ଡାକ୍ତର ଅଭାବ ତଥା ସ୍ଵଷ୍ଟ ସ୍ଵାସ୍ଥ୍ଯ ନୀତି ନଥିବା କାରଣରୁ ଡାକ୍ତର୍ ଗୁଣପୁର କୁ ଆସିପାରୁନାହାନ୍ତି। ଦିର୍ଘ ବର୍ଷ ହେବ ବିଭିନ୍ନ ସମୟରେ ଗୁଣପୁର ବାସୀ ମାନନୀୟ ମୁଖ୍ୟ ମନ୍ତ୍ରୀ, ମୁଖ୍ୟ ଶାଚନ ସଚିବ, ସ୍ଵାସ୍ଥ୍ଯ ସଚିବ ଓ ସ୍ଵାସ୍ଥ୍ଯ ମନ୍ତ୍ରୀ ଙ୍କୁ ଭେଟି ଗୁହାରୀ କରିଲେ ଓଲଟା ସେମାନେ କେଉଁ ଡାକ୍ତର ସେଠାକୁ ଆସିବାକୁ ଇଚ୍ଛୁକ ସେମାନଙ୍କ ଠାରୁ ଲିଖିତ ଆକାରରେ ଆଣିବାକୁ କୁହାଯାଇଥିବା ଅଭିଯୋଗ ହୋଇଛି। ଗଣ ମାଧ୍ୟମ ମାନଙ୍କ ରେ ବାରମ୍ବାର ଖବର ପ୍ରକାଶ ପରେ ଜଣେ ଦୁଇଜଣ ଡାକ୍ତର୍ ଙ୍କୁ ଉପଖଣ୍ଡ ଚିକିତ୍ସାଳୟ ରେ ନିଯୁକ୍ତି ଦିଆଯାଉଛି। କିନ୍ତୁ ପରବର୍ତ୍ତୀ ମୁହୂର୍ତ୍ତରେ ସେହି ଡାକ୍ତର୍ ମାନେ ପି.ଜି, ପି.ଏଚ୍.ଡି ଓ ସୁପର ସ୍ପେଶିଆଲିଷ୍ଟ ପାଠ ପଢିବା ନାଁରେ ଏଠାରୁ ଖସି ପଳାଇ ବଡ ସହର୍ ମାନଙ୍କ ରେ ମୋଟା ଅଙ୍କରେ ଦରମା ପାଇ ରହିଯାଉଛନ୍ତି।
ତେବେ ଏଭଳି ସମସ୍ୟା ଉପକୂଳ ଓଡ଼ିଶାରେ ଦେଖାଯାଉନଥିବା ବେଳେ ଗୁଣପୁର ଅଞ୍ଚଳରେ ରାଜ ନୈତିକ ଇଛାଶକ୍ତି ଅଭାବ ଓ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଙ୍କ ବୈମାତୃକ ମନୋଭାବ ଯୋଗୁଁ ସମସ୍ୟାର ସମାଧାନ ହୋଇପାରୁନାହିଁ ବୋଲି ସାଧାରଣରେ ଚର୍ଚ୍ଚା ଜୋର୍ ଧରିଛି। ଏଭଳି ସ୍ଥିତିରେ ଏଠାରେ ଲୋକେ କିଭଳି ଚିକିତ୍ସା ସେବା ପାଇ ପାରୁଥିବେ ଏଥିରୁ ସହଜରେ ଅନୁମାନ କରାଯାଇପାରେ । ଏ ତମାମ ସମସ୍ୟାର ସମାଧାନ ତୁରନ୍ତ କରିବା ସହ ଖୁବଶୀଘ୍ର ଖାଲି ପଡିଥିବା ଡ଼ାକ୍ତରୀ ପଦବୀ ପୂରଣର ଆବଶ୍ୟକତା ରହିଛି ।
କୋରାପୁଟ ଜିଲ୍ଲାରେ କୋରାପୁଟ ମେଡିକାଲ କଲେଜ ଥିବା ବେଳେ ଜୟପୁର ଉପଖଣ୍ଡ ସ୍ଵାସ୍ଥ୍ଯ ଚିକିତ୍ସାଳୟ କୁ ଯେଉଁ ଭଳି ଜିଲ୍ଲା ଚିକିତ୍ସାଳୟ ର ମାନ୍ୟତା ଦେଇ ସମସ୍ୟା ର ସମାଧାନ କରାଗଲା, ଅନୁରୂପ ଭାବେ ରାୟଗଡ଼ା ଜିଲ୍ଲାର ଆଦିବାସୀ ବହୁଳ ସବୁଠାରୁ ବଡ଼ ଉପଖଣ୍ଡରେ ଥିବା ଗୁଣପୁର ଉପଖଣ୍ଡ ଚିକିତ୍ସାଳୟ କୁ ଜିଲ୍ଲା ଚିକିତ୍ସାଳୟ ର ମାନ୍ୟତା ଦେଇ ସମସ୍ୟା ର ସମାଧାନ କରିବା ନିମନ୍ତେ ବିଭିନ୍ନ ସଂଗଠନ ପକ୍ଷରୁ ଦାବୀ ହେଉଛି।
