ବିଶ୍ୱ ପର୍ଯ୍ୟାବରଣ ଦିବସ ଉପଲକ୍ଷେ ଢେଙ୍କାନାଳର ସ୍ବେଚ୍ଛାସେବୀ ଅନୁଷ୍ଠାନ ଆରୋଗ୍ୟମ୍ ଯୋଗ ଏବଂ ୱେଲ୍ ଫେୟାର ଆସୋସିଏସନ(ଆଇୱା) ତରଫରୁ ଢେଙ୍କାନାଳ ଜିଲ୍ଲା, ସଦର ବ୍ଲକ ଅନ୍ତର୍ଗତ ସପ୍ତଶଯ୍ୟା ପର୍ଯ୍ୟଟନ ସ୍ଥଳୀଠାରେ ଏକ ସଫେଇ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଅଛି |ସପ୍ତଶଯ୍ୟା, ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ଏକ ମନୋରମ ପର୍ଯ୍ୟଟନ ସ୍ଥଳୀ ଅଟେ |ଏଠାକୁ ପ୍ରତ୍ୟେକ ଦିନ ଅନେକ ପର୍ଯ୍ୟଟକ ବୁଲିବା ଏବଂ ବଣଭୋଜି କରିବା ଉଦ୍ଦେଶ୍ୟରେ ଆସିଥାନ୍ତି |ବଣଭୋଜି ସାରିବା ପରେ ଖଲି, ପ୍ଲାଷ୍ଟିକ ବୋତଲ, ପ୍ଲାଷ୍ଟିକ ଗ୍ଲାସ ଏବଂ ଅନ୍ୟାନ୍ୟ ଆବର୍ଜନାକୁ ବହି ଯାଉଥିବା ଝରଣା ଏବଂ ପର୍ଯ୍ୟଟନ ସ୍ଥଳୀର ଏଣେତେଣେ ଫୋପାଡିଦେଇ ଆସୁଛନ୍ତି |ଏହାଦ୍ୱାରା ସେହି ପ୍ରାକୃତିକ ପରିବେଶଟିର ସୌନ୍ଦର୍ଯ୍ୟ ଏବଂ ନମନୀୟତା ହ୍ରାସ ପାଇବାରେ ଲାଗିଛି |ଏହି ତଥ୍ୟକୁ ସେଠାକୁ କିଛିଦିନ ତଳେ ବୁଲିବାକୁ ଯାଇଥିବା ଆଇୱା, ଢେଙ୍କାନାଳର କର୍ମକର୍ତ୍ତାମାନେ ହୃଦୟଙ୍ଗମ କରିଥିଲେ |ଏଣୁ ଏହି ପ୍ରାକୃତିକ ପରିବେଶକୁ ପ୍ଲାଷ୍ଟିକ ଏବଂ ଆବର୍ଜନା ମୁକ୍ତ କରିବା ପାଇଁ ସପ୍ତଶଯ୍ୟା ଗ୍ରାମପଞ୍ଚାୟତର ସରପଞ୍ଚ ଶ୍ରୀ ଅଭିମନ୍ୟୁ ବେହେରାଙ୍କୁ ଭେଟିଥିଲେ |ସରପଞ୍ଚ ବେହେରାଙ୍କ ସହାୟତାରେ ଆଇୱାର କର୍ମକର୍ତ୍ତାମାନେ ଏକ ନିରନ୍ତର ସଫେଇ କାର୍ଯ୍ୟକ୍ରମ କରିବା ପାଇଁ ପ୍ରତିଶୃତିବଦ୍ଧ ହୋଇଛନ୍ତି |ଏହି କାର୍ଯ୍ୟକ୍ରମରେ ଆଇୱାର କର୍ମକର୍ତ୍ତାଙ୍କ ସହ ସପ୍ତଶଯ୍ୟାର କିଛି ସ୍ବେଚ୍ଛାସେବୀ ଯୁବକ,ସରପଞ୍ଚ,ଏମ୍ . ବି. କେ., ସି. ଆର . ପି ଯୋଗ ଦେଇଥିଲେ|କାର୍ଯ୍ୟକ୍ରମର ପ୍ରାରମ୍ଭରେ ବାହାନଗା ଠାରେ ଘଟିଥିବା ମର୍ମନ୍ତୁଦ ଟ୍ରେନ ଦୁର୍ଘଟଣାର ମୃତକ ମାନଙ୍କର ଆତ୍ମାର ସଦଗତି ଏବଂ ଆହତ ମାନଙ୍କର ଶ୍ରୀଘ୍ର ସୁସ୍ଥତା କାମନା କରି ଏକ ପ୍ରାର୍ଥନା ସଭା ଅନୁଷ୍ଠିତ ହୋଇଥିଲା |
