କୁହୁଡି,୨୯/୦୭(ବିନୁ ଦାସ୍) ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ କୁହୁଡି ଫାଣ୍ଡି ଜାତୀୟ ରାଜପଥ ୧୬ କୁହୁଡି କଇଥିପଲା ଛକ ନିକଟରେ ନିଜକୁ ପୋଲିସ ଅଧିକାରୀ କହି ଦାଦାଵଟୀ ଆଦାୟ କରୁଥିବା ବେଳେ ସ୍ଥାନୀୟ ବ୍ୟକ୍ତିଙ୍କ ହାବୁଡ଼ରେ ପଡି ଯୁବକ ଜଣକୁ କୁହୁଡି ଫାଣ୍ଡିରେ ଧରି ଜିମା ଦେଇଛନ୍ତି। ପ୍ରାପ୍ତ ସୂଚନା ମୁତାବକ ଗଞ୍ଜାମ ଶେରଗଡ଼ ଥାନା ଅନ୍ତର୍ଗତ ଖାସପା ଗ୍ରାମର ଭାଇଗ ବିଶ୍ୱାଳଙ୍କ ପୁତ୍ର ସନ୍ତୋଷ ବିଶ୍ୱାଳ ନିଜକୁ ପୋଲିସ ଅଧିକାରୀ କହି ରାଜପଥ ଉପରେ ଯାତାୟାତ କରୁଥିବା ଗାଡି ମାନଙ୍କ ଠାରୁ ବଟି ଆଦାୟ କରୁଥିବା ବେଳେ ହଠାତ ଆଜି କାଳୁପଡ଼ା ଘାଟ ଅଞ୍ଚଳର ଚନ୍ଦ୍ରକାନ୍ତ ପଳାଇଙ୍କର ଓଡ଼ି ୩୩ ଏବି ୧୫୪୨ ନମ୍ବର ବିଶିଷ୍ଟ କଙ୍କଡ଼ା ବୋଝେଇ ଡାଲା ଅଟୋକୁ ଅଟକାଇଥିଲା ।
ସମ୍ପୃକ୍ତ ଗାଡି ମାଲିକ ଏବଂ ଡ୍ରାଇଭରଙ୍କର ସନ୍ଦେହ ହେବାରୁ ଅଧିକ ଖୋଳତାଡ଼ କରି ପୋଲିସ ଜିମା ଦେବାରେ କୁହୁଡି ଫାଣ୍ଡି ଅଧିକାରୀ ନିରଞ୍ଜନ ରାଉତ ୨୪୯/୨୧ ରେ ଏକ ମକଦ୍ଦମା ରୁଜୁକରି ଅଭିଯୁକ୍ତ ସନ୍ତୋଷ କୁ ଅଧିକ ଜେରା କରୁଛନ୍ତି । ବାଲୁଗାଁ ଏସଡିପିଓ ମାନସ ରଞ୍ଜନ ବାରିକ ଆମ ପ୍ରତିନିଧିଙ୍କୁ କହିଛନ୍ତି କି ପୋଲିସ ମାମଲା ରୁଜୁକରି ଅଧିକ ତଦନ୍ତ ଚଳାଇଛି।
