ବରଗଡ଼,୦୯।୦୯: ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡ ଅନ୍ତର୍ଗତ ବିଜେପୁର ଥାନା କଲେଜ ଛକରେ ଏକ ଅଜଣା ଗାଡି ଧକ୍କାରେ ବାଇକ୍ ଚାଳକର ମୃୃତ୍ୟୁ ହୋଇ ଯାଇଛି । ମୃତକ ଜଣକ ହେଲେ ବିଜେପୁର ଥାନା ଅନ୍ତର୍ଗତ କର୍ଲେ ଗାଁର କାର୍ତ୍ତିକ ନାଏକ (୨୫) । ବାଇକରେ ବସିଥିବା ବୁଡାପାଲିର ମାନସ ପାଇକଙ୍କ ଡାହାଣ ହାତ ଭାଙ୍ଗି ଗୁରୁତର ହୋଇଥିବା ସୂଚନା ରହିଛି । ମିଳିଥିବା ସୂଚନା ମୁତାବକ କାର୍ତ୍ତିକ ନାଏକ ଅପରାହ୍ନରେ ପଡୋଶୀଙ୍କ ସିଡି ଡିଲକ୍ସ ବାଇକ୍ ନଂ ଓଆର୍ ୧୭ଜେ ୨୩୮୧ରେ ଗାଁରୁ କୌଣସି କାମରେ ବିଜେପୁର ରାସ୍ତାଦେଇ ପଡା ଗ୍ରାମକୁ ଯାଉଥିଲେ। ବାଟରେ ବୁଡାପାଲିର ମାନସ ପାଇକ ଲିଫ୍ଟ ମାଗି ତାଙ୍କ ସହ ଯାଉଥିଲେ। ବିଜେପୁର-ପଦ୍ମପୁର ରାସ୍ତାର କଲେଜ ଛକରେ ଏକ ଅଜଣା ଗାଡି ଧକ୍କା ଦେଇ ଫେରାର୍ ହୋଇ ଯାଇଥିଲା। ଫଳରେ ନିକଟରେ ରହିଥିବା ଦମକଳ କେନ୍ଦ୍ରର କର୍ମଚାରୀମାନେ ସେମାନଙ୍କୁ ଉଦ୍ଧାର କରି ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ। ଡାକ୍ତର କାର୍ତ୍ତିକକୁ ମୃତ ଘୋଷଣା କରିଥିବାବେଳେ ମାନସ ପାଇକଙ୍କ ପ୍ରାଥମିକ ଚିକିତ୍ସା ପରେ ତାଙ୍କୁ ଜିଲ୍ଲା ହସପିଟାଲକୁ ସ୍ଥାନାନ୍ତର କରାଯାଇଛି। ପୋଲିସ୍ ମୃତ ଶବକୁ ଜବତ କରି ଦୁର୍ଘଟଣା ଘଟାଇ ଫେରାର୍ ହୋଇଥିବ ଗାଡିକୁ ଧରିବାକୁ ତଦନ୍ତ ଚଳାଇଛନ୍ତି ।
ଇପିଏରୁ Niranjan Tripathy ଙ୍କ ରିପୋର୍ଟ
