ମୁମ୍ବଇ : ଫୁସଫୁସ୍ କର୍କଟ ରୋଗରେ ପୀଡିତ ହୋଇଛନ୍ତି ବଲିଉଡ଼ ଅଭିନେତା ସଞ୍ଜୟ ଦତ୍ତ । ୬୧ ବର୍ଷୀୟ ସଞ୍ଜୟ ଗତ ୮ ତାରିଖରେ ଶ୍ଵାସକ୍ରିୟାରେ ସମସ୍ୟା ଯୋଗୁଁ ଲୀଳାବତୀ ହସ୍ପିଟାଲରେ ଭର୍ତ୍ତି ହୋଇଥିଲେ। ତାଙ୍କର କରୋନା ଟେଷ୍ଟ ମଧ୍ୟ କରାଯାଇଥିଲା । କରୋନା ରିପୋର୍ଟ ନେଗେଟିଭ୍ ଆସିବା ପରେ ସେ ଡାକ୍ତରଖାନାରୁ ଡିସଚାର୍ଜ ହୋଇଥିଲେ। ଆଜି ହିଁ ସଞ୍ଜୟ ଦତ୍ତ ଟ୍ଵିଟ୍ କରି ନିଜର ପ୍ରଶଂସକଙ୍କୁ ସ୍ଵାସ୍ଥ୍ୟ ଅସୁସ୍ଥ ଥିବା ଖବର ଦେଇଥିଲେ। ଏହି ଟ୍ଵିଟ୍ ପରେ ପ୍ରଶଂସକଙ୍କ ଚିନ୍ତା ବଢି ଯାଇଥିଲା। ଏବେ ସଞ୍ଜୟ ଦତ୍ତଙ୍କ କ୍ୟାନସର ରୋଗ ବିଷୟରେ ଶୁଣି ପ୍ରଶଂସକ ଚକିତ ହୋଇ ପଡିଛନ୍ତି । ତାଙ୍କର ଏହି ରୋଗ ତୃତୀୟ ପର୍ଯ୍ୟାୟରେ ରହିଛି। ସୂଚନା ଅନୁଯାୟୀ ଏହି ଗମ୍ଭୀର ରୋଗର ଚିକିତ୍ସା ପାଇଁ ସଞ୍ଜୟ ଦତ୍ତ ଶୀଘ୍ର ବିଦେଶ ଯିବେ।
