ଗୁଣପୁର,୨୩।୦୬, (ସିଦ୍ଧାର୍ଥ ଦାସ) ଗୁଣପୁର ଉପ ଜିଲ୍ଲାପାଳ ଶ୍ରୀ ସୋନାଲ ଜେନା ଙ୍କ ଅଧ୍ୟକ୍ଷତାରେ ଗୁଣପୁର ଉପଖଣ୍ଡରେ ଚଳିତବର୍ଷ ରଥଯାତ୍ରା ପାଳନ ନେଇ ଏକ ପ୍ରସ୍ତୁତି ବୈଠକ ଉପ ଜିଲ୍ଲାପାଳ ଙ୍କ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି । କୋଭିଡ କଟକଣାକୁ ଆଖି ଆଗରେ ରଖି କେବଳ ସେବାୟତ ମାନଙ୍କୁ ନେଇ ଶ୍ରୀଜୀଉଙ୍କ ରୀତିନୀତି ପାଳନ କରାଯିବାକୁ ସର୍ବସମ୍ମତି କ୍ରମେ ସ୍ଥିର କରାଗଲା । ରଥଯାତ୍ରା ସମୟରେ ରଥ ଟଣା ହେବ ନାହିଁ କି ଶ୍ରୀଜୀଉଙ୍କୁ ବାହାରକୁ ଅଣାଯିବ ନାହିଁ । ସର୍ବସାଧରଣ ଦର୍ଶନ ଉପରେ କଟକଣା ଜାରି କରାଯାଇଛି । ମନ୍ଦିର ସାମ୍ନା ଗେଟ ସମ୍ପୂର୍ଣ୍ଣ ବନ୍ଦ କରି ଯାତ୍ରା ସମୟର ସମସ୍ତ ନୀତିକାନ୍ତି ପାଳନ କରାଯିବ । ଯଦି ଆବଶ୍ୟକ ହୁଏ ମନ୍ଦିର ପରିସରରେ ୧୪୪, ୧୦୭ ଓ ୧୦୮ ଧାରା ଲାଗୁ କରାଯିବ ।
ସେହିପରି ଦେବ ସ୍ନାନ ପୂର୍ଣ୍ଣିମା ମଧ୍ୟ ବିନା ଭକ୍ତରେ କେବଳ ପାରମ୍ପାରିକ ସେବାୟତ ଙ୍କୁ ନେଇ ଅନୁଷ୍ଠିତ ହେବ । ଏହି ଅନୁରୂପରେ ଗୁଣପୁର ଉପଖଣ୍ଡର ସମସ୍ତ ତହସିଲର ଜଗନ୍ନାଥ ମନ୍ଦିରରେ ପାଳନ କରିବା ନିମନ୍ତେ ସ୍ଥିର କରା ଯାଇଥିବା ଅତିରିକ୍ତ ଲୋକ ସମ୍ପର୍କ ଓ ସୂଚନା ଅଧିକାରୀ ଜଣା କରିଛନ୍ତି । ଆଜିର ଏହି ବୈଠକରେ ଗୁଣପୁର ତହସିଲଦାର ତଥା ଦେବୋତ୍ତର ଅଧିକାରୀ ଶ୍ରୀ ଶରତ ଚନ୍ଦ୍ର ନାୟକ ଙ୍କ ସମେତ ଉପଖଣ୍ଡ ଅଧୀନସ୍ଥ ସମସ୍ତ ତହସିଲଦାର, ଗୁଣପୁର ଆଦର୍ଶ ଥାନା ଅଧିକାରୀ ଶ୍ରୀ ଜଶବନ୍ତ କୁମାର ହିଆଲ୍, ମନ୍ଦିର ପରିଚାଳନା କମିଟି ସମ୍ପାଦକ ପ୍ରମୁଖ ଉପସ୍ଥିତ ଥିବା ସୂଚନା ମିଳିଛି ।
ଦେବସ୍ନାନ ପୂର୍ଣ୍ଣିମା ଦିନ ହେବାକୁ ଥିବା କାର୍ଯ୍ୟକ୍ରମ ରେ ଦେବୋତ୍ତର ଅଧିକାରୀ ତଥା ଗୁଣପୁର ତହସିଲଦାର ଙ୍କ ଦ୍ଵାରା ପରିଚୟ ପତ୍ର ପ୍ରଦାନ କରାଯାଇଥିବା ୨୬ ଜଣ ସେବାୟତଙ୍କୁ ନେଇ ବିନା ଭକ୍ତ ଙ୍କ ଗହଣରେ ମନ୍ଦିର ମଧ୍ୟରେ ନୀତିକାନ୍ତି ସମ୍ପୂର୍ଣ୍ଣ କରାଯିବା ପାଇଁ ମାନନୀୟ ଉପଜିଲ୍ଲାପାଳଙ୍କ ନିର୍ଦ୍ଦେଶ ରହିଥିବା ବିଶ୍ୱସ୍ତ ସୂତ୍ର ରୁ ଜଣାପଡିଛି।
ତୃତୀୟ ଲହରୀରେ ହେବାକୁ ଥିବା କରୋନା ସଂକ୍ରମଣ କୁ ରୋକିବା ଦିଗରେ ମାନନୀୟ ଉପଜିଲ୍ଲାପାଳ ଙ୍କ ଏଭଳି ଆଇନ ସମ୍ମତ ପଦକ୍ଷେପ କୁ ସାଧାରଣ ରେ ଭୂୟସୀ ପ୍ରଶଂସା କରାଯାଇଛି। ଦେବସ୍ନାନ ପୂର୍ଣ୍ଣିମା ରେ ଭକ୍ତ ଙ୍କ ଭିଡ଼ ଏଡ଼ାଇବା ନିମନ୍ତେ ଗୁଣପୁର ତହସିଲଦାର, ଆଦର୍ଶ ଥାନା ଭାରପ୍ରାପ୍ତ ଅଧିକାରୀ ଏବଂ ରାଜସ୍ଵ ନିରୀକ୍ଷଣ ଶ୍ରୀ. ମାଣିକାଣ୍ଠା ଓ ଏସଆଇ ରବୀନ୍ଦ୍ରନାଥ ଗୌଡ ଙ୍କ ଉପସ୍ଥିତିରେ ମନ୍ଦିର ପରିସର କୁ ବେରିକେଟ ଦ୍ଵାରା ଆବଦ୍ଧ କରାଯାଇଛି।
