ଖଲ୍ଲିକୋଟ 🙁 ସୁଶୀଲ ଲେଙ୍କା)) ଖଲ୍ଲିକୋଟ ଥାନା ଅନ୍ତର୍ଗତ ମାଣିକପୁର ଗ୍ରାମରେ ଚାଉଳ ନେବା ପାଇଁ ଆସିଥିବା ଭଉଣୀଙ୍କୁ ଜ୍ବାଇଁଙ୍କ ଅତର୍କିତ ଆକ୍ରମଣ । ପ୍ରତିବାଦରେ ଦୁଇ ଶଳା ,ଶଶୁର ଓ ଜ୍ବାଇଁଙ୍କ ମଧ୍ୟରେ ଆକ୍ରମଣ ଓ ପ୍ରତି ଆକ୍ରମଣ ଘଟଣାରେ ଉଭୟ ପକ୍ଷର ଦୁଇ ଜଣ ଆହତ ହୋଇଥିବା ଜଣାପଡିଛି। ସୂଚନା ଅନୁଯାୟୀ ମଙ୍ଗଳବାର ସକାଳେ ମାଣିକପୁର ଗ୍ରାମର ନିରଞ୍ଜନ ଜେନାଙ୍କ ପତ୍ନୀ ଲକ୍ଷ୍ମୀ ଜେନା ମାଣିକପୁର ପଞ୍ଚାୟତ କାର୍ଯାଳୟକୁ ପିଡିଏସ ଚାଉଳ ନେବାପାଇଁ ଆସିଥିବା ବେଳେ ପୂର୍ବ ମନୋମାଳିନ୍ୟକୁ କେନ୍ଦ୍ର କରି ନିରଞ୍ଜନ ତାର ପତ୍ନୀ ଲକ୍ଷ୍ମୀକୁ ମାଡ ମାରିଥିଲା। ଏହି ଘଟଣା ଲକ୍ଷ୍ମୀ ତାର ଖୋଜାପଲ୍ଲୀରେ ବାପ ଘରକୁ ଫୋନ ମାଧ୍ୟମରେ ଜଣାଇଥିଲା। ଘଟଣା ଜାଣିବା ପରେ ଲକ୍ଷ୍ମୀର ଦୁଇ ଭାଇ ଜିତେନ୍ଦ୍ର ଦୁହୁଡି,ତିରୁପତି ଦୁହୁଡି ଓ ବାପା ଦଣ୍ଡପାଣି ଦୁହୁଡି ମାଣିକପୁର ଆସି ନିରଞ୍ଜନକୁ ଆକ୍ରମଣ କରି ନିସ୍ତୁକ ମାଡ ମାରି ଲହୁଲୁହାଣ କରିଥିଲେ। ଫଳରେ ନିରଞ୍ଜନ ତାର ପ୍ରତି ଆକ୍ରମଣ କରି ଶଳା ତିରୁପତି ଦୁହୁଡିକୁ ବ୍ଳେଡରେ ଆକ୍ରମଣ କରିଥିଲା । ଖବର ପାଇ ଖଲ୍ଲିକୋଟ ଓ ଭେଜିପୁଟ ପୋଲିସ ଘଟଣା ସ୍ଥଳରେ ପହଞ୍ଚି ଅଚେତ ଅବସ୍ଥାରେ ଥିବା ନିରଞ୍ଜନ ଓ ଆହତ ହୋଇଥିବା ତିରୁପତିକୁ ଘଟଣା ସ୍ଥଳରୁ ଉଦ୍ଧାର କରି ପ୍ରାଥମିକ ଚିକିତ୍ସା ନିମନ୍ତେ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ପ୍ରକାଶ ଥାଉକି ନିରଞ୍ଜନ ଓ ଲକ୍ଷ୍ମୀଙ୍କ ମଧ୍ୟରେ ଦୀର୍ଘ ଦିନ ହେଲା ମତଭେଦ କାରଣରୁ ଲକ୍ଷ୍ମୀ ନିର୍ଯାତନାର ଶୀକାର ହୋଇ ଦୁଇ ସନ୍ତାନଙ୍କ ସହ ଖୋଜାପଲ୍ଲୀରେ ବାପଘରେ ରହିଆସିଛନ୍ତି ।
