ଭୁବନେଶ୍ବର: କାମ ଦେଉଛି ଲକ୍ଡାଉନ୍ ଓ ସପ୍ତାହାନ୍ତ ସଟ୍ଡାଉନ୍ କଟକଣା। ରାଜ୍ୟରେ କରୋନା ସ୍ଥିତି ସୁଧୁରିବାରେ ଲାଗିଛି। ରାଜ୍ୟରେ ବର୍ତ୍ତମାନ ୭.୨୩% ରହିଛି ପଜିଟିଭ୍ ହାର। ଅର୍ଥାତ ୧୦୦ ନମୁନା ପରୀକ୍ଷାରେ ୭ ନମୁନା ପଜିଟିଭ୍ ଆସୁଛି। ୧୯ ଜିଲ୍ଲାରେ ସଂକ୍ରମଣ ସଂଖ୍ୟା କମିଥିବା ବେଳେ ୧୧ ଜିଲ୍ଲାରେ ବଢିଛି। ତେବେ ପଜିଟିଭ ହାରକୁ ଅନୁଧ୍ୟାନ କରିବା ପରେ ଆସନ୍ତା ୧୭ରୁ ୨୬ଟି ଜିଲ୍ଲାରେ ଅନଲକ ପ୍ରକ୍ରିୟା ସରକାର ଆରମ୍ଭ କରିବେ ବୋଲି ଜଣାପଡ଼ିଛି।
୧୭ ତାରିଖ ପରେ ରାଜ୍ୟରେ ଅନଲକ୍ ପ୍ରକ୍ରିୟା ଆରମ୍ଭ ହେବ। କିଛି ନିୟମ କୋହଳ ହୋଇପାରେ ଆଉ କିଛି ନିୟମ ବଳବତ୍ତର ରହିବ। ତେବେ ଅନୁଗୁଳ, ଖୋର୍ଦ୍ଧା, କଟକ ଓ ଯାଜପୁର ପାଇଁ ସ୍ୱତନ୍ତ୍ର ଷ୍ଟ୍ରାଟେଜି ହେବ ବୋଲି ସ୍ୱାସ୍ଥ୍ୟସେବା ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର କହିଛନ୍ତି । ଅନଲକ୍ କରିବାକୁ ସରକାର ପଦକ୍ଷେପ ନେଉଛନ୍ତି।
ସମସ୍ତ ଜିଲ୍ଲାକୁ ୩ ଜୋନ୍ରେ ବିଭକ୍ତ କରି ସରକାର ଅନଲକ ପ୍ରକ୍ରିୟା ଆରମ୍ଭ କରିବେ ବୋଲି ଜଣାପଡ଼ିଛି। ପଜିଟିଭ୍ ହାର ୧୦% ରୁ ଅଧିକ ଥିବା ଜିଲ୍ଲାରେ ବଳବତ୍ତର ରହିବ ଲକ୍ଡାଉନ। ଆଉ ୫% ତଳେ ପଜିଟିଭ୍ ହାର ଥିଲେ ନିୟମକୁ କୋହଳ କରାଯିବ।
ରାଜ୍ୟରେ ମୃତ୍ୟୁ ସଂଖ୍ୟା ବୃଦ୍ଧି ପଛରେ କାରଣ ଦର୍ଶାଇ ଡା. ମହାପାତ୍ର କହିଛନ୍ତି ଯେ ପୂର୍ବ କେସ ଲୋଡ୍ ଓ ଏବେ ବି କିଛି ଲୋକ ଗୁରୁତର ଅବସ୍ଥାରେ ଥିବା କାରଣରୁ ମୃତ୍ୟୁ ସଂଖ୍ୟା ବଢ଼ୁଛି। ମାତ୍ର ଏଥିପାଇଁ ଚିନ୍ତା କରିବାର ଆବଶ୍ୟକତା ନାହିଁ। ଏବେ ୬୨ପ୍ରତିଶତ ରୋଗୀ ଆଇସିୟୁ ଓ ଭେଣ୍ଟିଲେଟର୍ରେ ରହିଥିବା ସେ ସୂଚନା ଦେଇଛନ୍ତି।
ଅପରପକ୍ଷରେ ବରିଷ୍ଠ ଚିକିତ୍ସକ ଡା. ନିରୋଜ ମିଶ୍ରଙ୍କ କହିବା କଥା, ଆସନ୍ତା ୧୭ ତାରିଖ ବେଳକୁ ସଂକ୍ରମଣ ହାର ୫ ପ୍ରତିଶତକୁ ଖସି ଆସିବାର ସମ୍ଭାବନା ରହିଛି। ଯେଉଁ ଜିଲ୍ଲାରେ ସଂକ୍ରମଣ ୫ପ୍ରତିଶତରୁ କମ୍ ରହିଛି, ସେଠାରେ ସଂପୂର୍ଣ୍ଣ ଅନଲକ୍ ନ କରି ସାମାନ୍ୟ କୋହଳ କରାଯିବା ଜରୁରୀ। ନଚେତ୍ ପୁଣିଥରେ ସଂକ୍ରମଣ ବଢ଼ିବାର ଆଶଙ୍କା ରହିଛି।
