ପୁରୀ, ପୁରୀ ଏସପି ଅଖିଳେଶ୍ବର ସିଂହଙ୍କୁ ବଦଳି କରାଯାଇଛି । ତାଙ୍କ ସ୍ଥାନରେ ସମ୍ବଲପୁର ଏସପି କେ. ବିଶାଳ ସିଂହଙ୍କୁ ପୁରୀ ଏସପି ଭାବରେ ଅବସ୍ଥାପିତ କରାଯାଇଛି । ତତ୍କ୍ଷଣାତ୍ ଏହି ପରିବର୍ତନ କାର୍ଯ୍ୟକାରୀ କରିବାକୁ ନିର୍ଦେଶ ଦିଆଯାଇଛି ।
ଅନ୍ୟପକ୍ଷରେ ଜାତୀୟ ମାନବାଧିକାର କମିଶନ ଓ ହାଇକୋର୍ଟ ଏହି ପ୍ରସଙ୍ଗରେ ସରକାରଙ୍କୁ ରିପୋର୍ଟ ତଲବ କରିଛନ୍ତି । ପୁରୀ ଏସପି ଅଖିଳେଶ୍ବର ସିଂହଙ୍କୁ ବଦଳି ପାଇଁ ଦାବି ହୋଇଥିଲା । ଏସବୁକୁ ଦୃଷ୍ଟିରେ ରଖି ରାଜ୍ୟ ସରକାର ଏସପି ଅଖିଳେଶ୍ବର ସିଂହଙ୍କୁ ବଦଳି କରି ମୁଖ୍ୟାଳୟରେ ଅବସ୍ଥାପିତ କରିଛନ୍ତି । ତାଙ୍କ ସ୍ଥାନରେ କେ. ବିଶାଳ ସିଂହଙ୍କୁ ତୁରନ୍ତ କାର୍ଯ୍ୟଭାର ଗ୍ରହଣ କରିବାକୁ ନିର୍ଦେଶ ଦେଇଛନ୍ତି ।
ସୂଚନାଯୋଗ୍ୟ, ଗତକାଲି ପୁରୀ ଓ ସୁନ୍ଦରଗଡ଼ ଜିଲ୍ଲାରେ ଦୁଇଟି ହାଜତମୃତ୍ୟୁ ଘଟଣା ପଦାକୁ ଆସିଥିଲା। ବିରୋଧୀ ଦଳ ଏହାକୁ ମୁଖ୍ୟ ପ୍ରସଙ୍ଗ କରି ଆଜି ବିଧାନସଭାରେ ହଟ୍ଟଗୋଳ କରିଥିଲା। ପୁରୀରେ ୩୦ବର୍ଷୀୟ ଯୁବକ କେ.ରମେଶଙ୍କର ହାଜତରେ ମୃତ୍ୟୁ ହେବାପରେ ତାଙ୍କ ପରିବାରର ଅଜାଣତରେ ପୁଲିସ ଶବଦାହ କରିଥିଲା। ଏପରିକି ତାଙ୍କ ପରିବାର ସଦସ୍ୟଙ୍କୁ ଅନ୍ୟ କେଉଁ ମାମଲାରେ ଅନ୍ୟ ଥାନାରେ ଅଟକ ରଖିଥିଲା। ଯେଉଁଥିପାଇଁ ଗତକାଲି ପୁରୀରେ ତୀବ୍ର ଉତ୍ତେଜନା ଦେଖାଦେଇଥିଲା।
